Birinchi Samarqand xalqaro iqlim forumi boʻlib oʻtadi

Dunyo

Oʻzbekiston navbatdagi yirik xalqaro tadbirga mezbonlik qiladi. Joriy yilning 4–5-aprel kunlari "Silk Road Samarkand" kongress markazida birinchi Samarqand xalqaro iqlim forumi boʻlib oʻtadi.

Birinchi Samarqand xalqaro iqlim forumi boʻlib oʻtadi
Bu forum nafaqat Oʻzbekiston, balki butun Markaziy Osiyo uchun muhim ahamiyat kasb etadi. Jahon yetakchilari, siyosatchilar, ekspertlar va ekologik faollar bu yerda to‘planib, mintaqadagi va dunyo miqyosidagi iqlim muammolarini muhokama qilishadi.

Forum "Markaziy Osiyo global iqlim muammolariga duch kelmoqda: umumiy farovonlik uchun birlashish" mavzusi ostida tashkil etilmoqda. Tadbir ekologik barqarorlik, yashil iqtisodiyot va iqlim barqarorligi bo‘yicha xalqaro hamkorlikni mustahkamlashga qaratilgan.

Unda quyidagi muhim yo‘nalishlar bo‘yicha muhokamalar oʻtkaziladi:

Qayta tiklanadigan energiya manbalarini rivojlantirish;

Suv resurslarini kompleks boshqarish;

Biologik xilma-xillikni saqlash;

Barqaror shahar rivojlanishi;

Iqlim o‘zgarishining ijtimoiy-iqtisodiy oqibatlari

Forum doirasida alohida e’tibor global ekologik halokatning yaqqol namunasi boʻlgan Orol dengizi inqiroziga qaratiladi. Ushbu mavzuda mutaxassislar va hukumat vakillari tomonidan zarar koʻrgan hududlarni tiklash, choʻllanishga qarshi kurashish hamda iqlim o‘zgarishining hudud aholisiga ta’sirini kamaytirish bo‘yicha muhim yechimlar muhokama qilinadi.

Tadbirda Markaziy Osiyo davlatlari, jumladan, Oʻzbekiston, Qozogʻiston, Qirgʻiziston, Tojikiston va Turkmaniston rahbarlari ishtirok etishi kutilmoqda. Shuningdek, Yevropa Ittifoqi, BMT, xalqaro moliya institutlari va yetakchi ekologiya tashkilotlari vakillari ham forumning muhim ishtirokchilari bo‘ladi

Forum natijasida "Yashil rivojlanishning Mintaqaviy Konsepsiyasi" qabul qilinishi rejalashtirilgan. Ushbu hujjat Markaziy Osiyo davlatlarining iqlim o‘zgarishi bo‘yicha yagona yondashuvini shakllantirishga asos bo‘lib xizmat qiladi. Shuningdek, u xalqaro tashkilotlarning mintaqadagi ekologik muammolarni hal qilish strategiyasini o‘z ichiga oladi.

Powered by Froala Editor

Do'stlar bilan ulashing