Qozog‘istonda Markaziy Osiyo davlatlari va Ozarbayjonning harbiy mashg‘ulotlari boshlandi

Ozarbayjon, Qozog'iston, Qirg'iziston, Tojikiston va O'zbekiston harbiy xizmatchilari ishtirokidagi "Birlestik-2024" mintaqaviy xalqaro o'quv mashg'ulotlari Qozog'istonning g'arbidagi Mangistau viloyatida boshlandi. Bu haqda Qozog'iston mudofaa vazirligi matbuot xizmati ma'lum qildi.

"Harbiy manevrlar Oymash poligonida, shuningdek, Toʻqmoq burnidan 2 km uzoqlikdagi dengiz hududida boʻlib oʻtadi. 8-iyuldan 17-iyulgacha harbiy kontingentlar qurolli mojaroni mahalliylashtirish boʻyicha qoʻshma operatsiyani tayyorlaydi va oʻtkazadi”, — deyiladi xabarda.

Mashg‘ulotlarga 4000 ga yaqin harbiy xizmatchi hamda 700 tagacha qurol va harbiy texnika jalb qilingan. “Taktik epizodlar quruqlik va havo razvedka guruhlari, dengiz maxsus kuchlari, armiya va front aviatsiyasi ekipajlari, harbiy kemalar va katerlar, artilleriya ekipajlari, hujum va tank bo‘linmalari ishtirokida o‘tkaziladi”, — deyiladi vazirlik xabarida.

Mashg‘ulotlar doirasida madaniy hordiq chiqarish va sport tadbirlari ham o‘tkaziladi. Shuningdek, harbiy-amaliy sport turlari, taktik orientirlash va armiya-taktik otish bo‘yicha musobaqalar tashkil etiladi.

Powered by Froala Editor