Tramp Pentagon va Markaziy razvedka boshqarmasidagi yangi lavozimlarni e’lon qildi

Tramp Fox News telekanalining taniqli jurnalisti Pit Hegsetni Mudofaa vaziri lavozimiga tayinlashini e'lon qildi. Trampning so‘zlariga ko‘ra, Hegsetning vatanparvarligi va AQSh qurolli kuchlarini qayta tiklashga intilishi uni mazkur lavozim uchun eng yaxshi tanlovga aylantiradi. Shuningdek, Tramp, Hegsetning harbiy tajribasi va AQSh armiyasidagi “so‘l qarashlarga” qarshi qat’iyatini alohida ta'kidladi.

CIA direktori lavozimiga esa sobiq milliy razvedka direktori Jon Ratkliff taklif qilindi. Tramp, ushbu tayinlovlar uning “kuch orqali tinchlik” siyosatini davom ettirish yo‘lidagi muhim qadam ekanini aytib o‘tdi. Shu bilan birga, Ichki xavfsizlik vazirligi rahbarligiga Janubiy Dakota gubernatori Kristi Noem nomzodini ko‘rsatdi.

Tramp, shuningdek, sobiq Arkanzas gubernatori Mayk Hakabini AQShning Isroildagi elchisi lavozimiga nomzod sifatida ko‘rsatdi. U Hakabining Isroil xalqi bilan yaqinligini tilga oldi va bu nomzodning Isroil uchun eng yaxshi tanlov ekanini ta'kidladi.

Shuningdek, Tramp Elon Mask va Vivek Ramasvamiga yangi tashkil etilgan "Hukumat samaradorligi bo‘limi"ga rahbarlik qilishni taklif qildi. Bu bo‘limda ular AQSh hukumatiga samaradorlikni oshirish bo‘yicha tavsiyalar berishadi va davlat boshqaruvida yangicha yondashuvlar taklif qilishadi. Mazkur guruh “DOGE” nomi bilan atalib, Maskning dogecoin kriptovalyutasiga ishora qiladi.

Powered by Froala Editor