Turkiyaning O‘zbekistondagi yangi elchisi o'z ishini boshladi

Ufuk Ulutash – xalqaro siyosat va diplomatiya sohasida katta tajribaga ega mutaxassis. U ilgari Turkiyaning Tashqi ishlar vazirligi tizimida turli lavozimlarda ishlagan, strategik tadqiqotlar va xalqaro munosabatlar bo‘yicha faoliyat yuritgan.

Ulutash 2021-yildan beri O‘zbekistonda xizmat qilgan Olgan Bekar o‘rnini egalladi. Uning yangi elchi sifatida tayinlanishi O‘zbekiston va Turkiya o‘rtasidagi o‘zaro ishonchli aloqalarni yanada mustahkamlashiga umid bog‘lanmoqda.

So‘nggi yillarda O‘zbekiston va Turkiya siyosiy, iqtisodiy va madaniy aloqalarni mustahkamlashda faol ishtirok etmoqda. Turkiya O‘zbekistonning eng yirik savdo hamkorlaridan biri bo‘lib, ikki davlat o‘rtasida sarmoyaviy loyihalar, texnologik hamkorlik va turizm sohalarida yirik tashabbuslar amalga oshirilmoqda.

Shuningdek, mintaqaviy xavfsizlik, transport va energetika sohalaridagi hamkorlik ham alohida ahamiyat kasb etmoqda. Yangi elchining tayinlanishi ushbu jarayonlarga yangi sur’at bag‘ishlashi kutilmoqda.

Tashqi ishlar vaziri Baxtiyor Saidov o‘z tabrigida shunday dedi, “Ishonchimiz komilki, birgalikdagi sa’y-harakatlarimiz har ikki mamlakat ravnaqi va taraqqiyotiga xizmat qiladi. Janob elchini ushbu lavozimga tayinlangani bilan samimiy tabriklaymiz va diplomatik missiyasida muvaffaqiyatlar tilaymiz.”

Ushbu uchrashuv O‘zbekiston va Turkiya o‘rtasidagi munosabatlarning yanada rivojlanishiga xizmat qilishi shubhasiz. Ufuk Ulutashning elchi sifatida faoliyati ikki mamlakat o‘rtasidagi aloqalarni yangi bosqichga olib chiqishiga katta umid bildirilmoqda.

Powered by Froala Editor